A nova configuración por proximidade xeográfica dos grupos de Primeira Futgal provocou que os equipos da zona norte de Pontevedra e os clubs da zona sur da provincia da Coruña vólvanse a cruzar moitas tempadas despois. A división Norte-Sur de Preferente e a antiga agrupación por provincias en Primeira Rexional facía que estas entidades non se cruzasen ata Terceira División, a pesar de non atoparse demasiado lonxe en termos xeográficos.
Este reencontro ocasiona que o grupo 5 de Primeira Futgal xunte aos principais proxectos deportivos de Pontevedra e da delegación de Santiago, que historicamente ocupaban postos altos nas distintas ligas da categoría. Todo isto leva a que a igualdade se presuma como máxima e a que sexa considerado por moitos como o “grupo da morte”. Hoxe, Futbolingalicia fala con 16 dos 18 adestradores da competición (non se logrou contactar cos técnicos de CD Arcade e SD Valiño) para analizar o comezo da tempada, que terá lugar este domingo.
Atlético Cuntis
No banco do Atlético Cuntis estréase Iván Castro. O técnico pensa que o nivel “vai ser moi alto, quizais do mellor dos últimos anos”, xa que “a pesar de que se perden bos equipos da zona de Vigo, os que entran do outro grupo son de gran nivel se ves a clasificación do ano anterior”. O novo adestrador recoñece que o obxectivo claro do seu equipo será a permanencia. “Vai ser un ano moi complicado polo alto nivel que vai ter o grupo e porque nos colle nunha tempada de moitos cambios con xente moi nova”, afirma Castro.
En canto ás sensacións do equipo, o preparador asegura que “estamos a traballar moi ben polo que somos optimistas e cremos que daremos o mellor de nós para competir en todos os campos”. “Esperamos que, aínda que sexamos un equipo moi novo, os xogadores se adapten canto antes á categoría, confíen, e todo salga ben”, engade Iván Castro.
Favoritos ao ascenso para Iván Castro: Ribadumia, San Martín, Puebla, Unión e Cordeiro.
Centro Cultural Deportivo Taragoña
Jorge Baleato cumprirá a súa terceira tempada á fronte do CCD Taragoña, co que conseguiu o ascenso desde a Segunda Galicia a tempada pasada. O adestrador do Val do Dubra afirma “descoñecer o nivel do grupo”, pero confirma que ten constancia de que “terá máis que o grupo coruñés”.
O obxectivo do club de Rianxo será a salvación, aínda que Baleato recoñece que “teremos que facelo moi ben para conseguila”. “Imaxínome que a liga se partirá con catro ou seis equipos loitando polo ascenso e os demais pelexando por conseguir a permanencia”, reflexiona o técnico.
Favoritos ao ascenso para Jorge Baleato: Puebla, Ribadumia, San Martín e Unión.
Club Deportivo Ribadumia
David Eirín baixou un chanzo este verán para tomar as rendas do Ribadumia, un club que buscará volver a Preferente tras perder a categoría a tempada pasada. O técnico de 33 anos opina que o grupo é “un dos máis competitivos de todos porque se uniron equipos moi potentes da zona de Santiago, con proxectos para estar moi arriba, con equipos que levan facendo moi ben as cousas estas últimas tempadas e que seguro pelexarán polos mesmos obxectivos”.
“Incluso os equipos que ascenderon están a facer cadros de persoal moi competitivos, polo que cada xornada será complicado sumar e ninguén regalará nada”, engade. Eirín recoñece que o seu equipo partirá co obxectivo de estar arriba, aínda que avisa de que, “a pesar de ser un recentemente descendido, somos un equipo practicamente novo e iso sempre require un tempo”. Con todo, o adestrador confía no proxecto e asegura que “estou convencido de que ao final conseguiremos pelexar por eses postos que dan acceso ao salto de categoría”.
Favoritos ao ascenso para David Eirín: Puebla, San Martín, Unión, Cordeiro e Ribadumia.
Club Deportivo Soutomaior
Raúl González relevou este verán a Jaime Calvar no banco do Soutomaior, que, tras quedar ás portas do ascenso fai dúas campañas, logrou dar o salto a Primeira Futgal o ano pasado. “O nivel é alto porque se xuntaron unha serie de equipos que, por diversas características como orzamento, campo de xogo ou continuidade do bloque, serán moi potentes”, reflexiona o técnico.
González admite que “as sensacións de pretemporada foron boas pola acollida, a continuidade dos xogadores e a ilusión que mostra o club no seu 50º aniversario” e opina que “calquera cousa que non sexa pensar en salvar a categoría, sería un erro”. “Espero que se cumpra o obxectivo sendo un equipo valente e recoñecible que vaia aos campos para ser protagonista. Queremos transmitir sensacións positivas as fins de semana porque, ao final, iso é o máis bonito que nos vai a deixar o fútbol”, engade con ilusión o técnico.
Favoritos ao ascenso para Raúl González: Ribadumia, Puebla, Cordeiro e Unión.
Club Deportivo Unión
Despois de non poder volver a Preferente, o Unión volverá tentar ascender esta campaña con Luisito González, que vivirá o seu terceiro curso ao mando do conxunto. “Creo que vai ser o grupo máis forte dos seis, dado que coinciden os equipos duros do grupo 2 do ano pasado cos máis potentes da zona de Pontevedra, ademais do Ribadumia. Creo que vai ser unha liga moi atractiva pero á vez complicada polo nivel dos equipos”, afirma.
Luisito asegura que “as sensacións de pretemporada son boas” e recalca a importancia de empezar ben a competición, “algo que o ano pasado non fixemos e é a nosa materia pendente”. “A meta é quedar o máis arriba posible sabendo da dificultade da liga. Somos un equipo competitivo e a nosa liña de traballo é a de tentar competir contra todos para que despois sexa a propia liga a que nos marque onde imos estar”, engade o preparador.
Favoritos ao ascenso para Luisito González: Puebla, Cordeiro, Ribadumia, San Martín, Unión Dena, Marín, Marcón e Unión.
Caldas Club de Fútbol
Con algo de sufrimento, o Caldas logrou a permanencia na categoría a tempada pasada con Borja González dirixindo ao equipo desde o banco. O técnico local pensa que é “un grupo moi forte con equipos con moito presuposto e cadros de persoal con un nivel superior á categoría”. “Espero unha liga máis desigual que a de anos anteriores porque leva anos sendo moi igualada e penso que este ano haberá sete ou oitos equipos que pelexarán polos postos altos e o resto farémolo por non caer ao precipicio”, engade.
O adestrador de Caldas móstrase orgulloso porque o seu equipo está formado por “xogadores da vila e que teñen moitas ganas e un gran xen competitivo”. “Quizais nos falta algo de experiencia pero ganas e ilusión non nos van faltar. Pelexaremos por salvar a categoría e manternos un ano máis en Primeira, un obxectivo que sería todo un orgullo para o club”, explica González.
Favoritos ao ascenso para Borja González: Puebla, Unión, Cordeiro, Ribadumia e San Martín.
Campo Lameiro Club Deportivo
‘Romario’ será o encargado de dirixir ao Campo Lameiro nesta nova tempada. O técnico considera o grupo como “o máis forte de todos, xunto ao de Vigo, porque engaden a catro dos cinco equipos máis potentes do grupo de Santiago, que queda moi mermado, e ao Ribadumia”.
O adestrador recoñece que “as sensacións do equipo son boas porque somos un grupo novo que leva moitos anos xogando xunto”, pero sabe que o único obxectivo debe ser “a permanencia na categoría”. “Espero unha tempada moi complicada e moi igualada polo nivel dos equipos, polo que se chega algo máis sería todo un éxito”, agrega ‘Romario’.
Favoritos ao ascenso para ‘Romario’: Ribadumia, San Martín, Puebla e Cordeiro.
Cordeiro Club de Fútbol
Por terceiro curso consecutivo, o Cordeiro estará adestrado por Suso Álvarez. “Non hai moito que debater, este grupo é o máis difícil de todos porque se xuntan equipos de moito nivel que nos últimos anos lograron grandes resultados ou que teñen moita historia”, asevera o técnico, que espera “unha liga extremadamente competitiva na que os favoritos non somen máis de catro ou cinco vitorias consecutivas”.
O preparador de Padrón asegura que “realizamos unha boa pretemporada contra rivais de superior categoría”, pero lamenta dúas lesións de longa duración e algunha baixa máis por motivos laborais. “As sensacións veranse no inicio de tempada pero son positivas se temos en conta o contexto de que somos un grupo curto”, engade. “O obxectivo é lograr o equilibrio entre sumar o maior número de puntos posibles e dar saída ao xogadores do filial e do equipo xuvenil”, asegura Álvarez.
Favoritos ao ascenso para Suso Álvarez: Ribadumia, Flavia, Puebla, Unión, Marcón, Marín, San Martín e Campo Lameiro.
Flavia Sociedade Deportiva
Á fronte do Flavia estará, por cuarta campaña seguida, José Carlos Rodríguez. O técnico móstrase cauteloso polo descoñecemento da gran parte dos seus rivais e sostén que “ata que nos enfrontemos a eles é moi difícil catalogar o nivel que nos imos a atopar esta tempada neste novo grupo”.
Rodríguez confirma que “as sensacións neste primeiro mes de adestramento son bastante positivas”. “Temos un equipo bastante renovado porque realizamos 15 incorporacións novas que hai que ir axustando, pero creo que imos ser un equipo competitivo”, engade o preparador. “Esperamos estar nos postos altos da clasificación o maior tempo posible e loitar polas prazas que nos dan a posibilidade de ascender directamente ou de xogar a fase de ascenso”, opina sobre os obxectivos do seu conxunto.
Favoritos ao ascenso para José Carlos Rodríguez: Puebla, Unión, Cordeiro, Flavia, San Martín e Ribadumia.
Marcón Atlético
Tras dúas tempadas pegando no pau do ascenso, o Marcón de Amador Cabaleiro regresa este ano á Primeira Futgal. “Creo que será un grupo de moito nivel porque os equipos de Pontevedra reforzáronse moi ben e os da zona de Santiago son equipos que sempre están a piques de ascender”.
Cabaleiro está contento coa pretemporada realizada polos seus pupilos ante “equipos moi bos como o Arosa xuvenil de División de Honra ou o Portonovo”. “Non deixamos de ser un conxunto mozo e novo na categoría e igual nos custa un pouco máis ao principio ata que lle tomemos o pulso, pero creo que estamos mentalizados para gozar desde o primeiro minuto. Será importante empezar ben para lograr a meta de sumar 40 ou 45 puntos que nos dean a salvación”, asegura o experimentado adestrador lerezán.
Favoritos ao ascenso para Amador Cabaleiro: San Martín, Ribadumia, Flavia, Cordeiro, Unión e Campo Lameiro.
Marín Club de Fútbol
O Marín será un dos proxectos máis ilusionantes do grupo tras conseguir dous ascensos de maneira consecutiva. Ibrahim Baptiste, que o ano pasado dirixiu ao Ribadumia, será o dono do banco de San Pedro e é coñecedor da dificultade da categoría. “O nivel do grupo será moi interesante tras a unión coa zona sur de Santiago”, opina o técnico.
Sobre os obxectivos do seu club, o adestrador francés cre que “somos un equipo novo con adestrador, directiva e 14 xogadores novos, polo que é unha incógnita”. “A pretemporada foi atípica porque tivemos moitas lesións e non puidemos ter a un número decente de xogadores para afrontar os amigables”, recoñece Baptiste, que tamén pensa que “temos un bo cadro de persoal que, por potencial, está moi ben armado”. “Tentaremos estar na zona nobre”, pecha o preparador.
Favoritos ao ascenso para Ibrahim Baptiste: Cordeiro, Unión, Ribadumia, San Martín, Puebla e Flavia.
Puebla Fútbol Club
Juan Alfonso Vidal cumprirá a súa segunda tempada no Puebla tras quedar ás portas do ascenso o curso anterior. O técnico recoñece que o nivel do grupo “será teoricamente máis duro porque a nova repartición de grupos prexudicounos moito ao xuntarse o segundo, terceiro e cuarto do grupo santiagués do ano pasado co San Martín, o Ribadumia, o proxecto do Marin e outros equipos que quedaron ben clasificados o ano pasado como o Campo Lameiro”. Aínda así, o preparador móstrase ilusionado porque “ter un grupo máis duro fai que sexa máis esixente pero tamén que a liga sexa máis bonita e se goce máis cada domingo”.
Vidal admite que a meta do seu equipo será “estar entre os tres mellores e loitar polo premio do ascenso”. “Sempre digo o mesmo, o obxectivo é ter o máximo de tickets para ascender ano tras ano. Ás veces non se ascende o primeiro ano ou o segundo pero estando sempre nas promocións ou loitando por ser o primeiro acabará chegando”, asegura o adestrador.
Favoritos ao ascenso para Juan Alfonso Vidal: Ribadumia, Puebla, Unión, Cordeiro, San Martín e Marín.
Sociedade e Deportiva San Adrián
Tras unha tempada preto da fase de ascenso, o San Adrián disputará unha nova campaña en Primeira Futgal con Álex Cuesta ao mando do conxunto. O adestrador cre que “o noso grupo é o máis forte porque descendeu un equipo moi potente como o Ribadumia, non ascenderon outros igual de fortes como o San Martín e incorpóranse equipos que quedaron na parte alta do grupo de Santiago”. “Noutros grupos a metade dos equipos son recentemente ascendidos, polo que o nivel será o máis alto”, engade.
Con todo, Cuesta admite que o equipo non chega na mellor condición ao inicio de liga posible porque “perdemos tres pezas moi importantes no verán e os reforzos aínda non chegan a ese nivel”. “A pretemporada non foi nada ben en canto a resultados e necesitamos dous ou tres reforzos como o comer”, recoñece o técnico. Aínda así, o preparador do San Adrián non perde a esperanza e afirma que “seremos un equipo moi complicado de vencer en casa e esperamos loitar por salvarnos o máis rápido posible”.
Favoritos ao ascenso para Álex Cuesta: Ribadumia, San Martín, Campo Lameiro e Arcade.
San Martín Club de Fútbol
Despois de rozar o ascenso a tempada pasada, o San Martín de Lino González inicia o curso con ganas de seguir dando que falar. O técnico do cadro vilagarcián opina que “o grupo cambiou bastante pero penso que o nivel será similar ao dos últimos anos”. “Sempre hai algún equipo que dá a sorpresa e outros que apuntan ao ascenso e fan un mal ano. Ao ser un grupo con moitos cambios, non se pode ter un coñecemento exacto do nivel, aínda que será unha liga igualada cun ascenso moi duro e competido”, reflexiona.
En canto á pretemporada dos seus pupilos, González afirma que “traballamos ben e cumprimos os obxectivos de preparación”. “A meta será a de volver estar arriba e chegar ao final con opcións de todo. Queremos volver facer un bo ano”, engade o experimentado adestrador.
Favoritos ao ascenso para Lino González: Puebla, Cordeiro, Ribadumia, San Martín e Campo Lameiro.
Unión Deportiva Cobres de Vilaboa
O Vilaboa conseguiu unha permanencia sufrida a campaña pasada con Jorge Fernández á fronte do equipo. O preparador continuará un ano máis na entidade, logrou o ascenso desde Segunda Galicia fai dúas campañas, e opina que “o grupo é dos máis fortes que hai na categoría”.
Sobre as sensacións coas que iniciarán a liga este domingo, Fernández pensa que “subimos bastante o nivel do equipo a nivel de calidade, táctica e físico”. “O obxectivo non será outro que salvarnos tentando non sufrir todo o que sufrimos a tempada pasada. Hai que buscar tres vítimas para despois mirar para arriba”, desenvolve o técnico.
Favoritos ao ascenso para Jorge Fernández: Ribadumia, San Martín, Arcade e Marín.
Unión Dena Club de Fútbol
O Unión Dena volve a Primeira Futgal un ano despois do descenso e farao con Nacho Durán no banco. O técnico asegura que “será unha liga moi esixente potenciada polos novos equipos que se suman de Santiago, que o ano pasado disputaron a fase de ascenso a Preferente”.
“A pesar de que a pretemporada do equipo foi complicada porque moitos xogadores traballan na hostalería, as sensacións de cara ao comezo de tempada son boas”, admite Nacho Durán. “Confeccionamos un cadro de persoal competitivo que mellora o da tempada anterior, xa que é unha nova categoría que nos esixirá moito máis. Esperamos competir contra todos e facer que o grupo e a afección gocen deste ano”, explica o adestrador.
Favoritos ao ascenso para Nacho Durán: San Martín, Ribadumia, Marín, Unión e Puebla.
