O Cedeira SD asinou unha das goleadas da xornada no grupo 1 da Primeira Futgal cun contundente 1-5 no campo do Orillamar. O conxunto cedeirés, que encabeza a clasificación, atravesa un gran momento de forma, no que tamén destaca Rafael Florin, autor de dous tantos no último encontro e que xa está a contribuír co seu olfacto goleador ao bo inicio do equipo.

O dianteiro regresou esta tempada ao club da súa vila despois de pasar polo Galicia de Mugardos, co que conseguiu o ascenso o curso pasado tras marcar once goles, e polo As Pontes, onde asinou a súa mellor cifra como sénior, con 16 tantos. Agora, de volta na casa e tras superar un inicio condicionado pola falta de pretempada, busca axudar o Cedeira a seguir medrando. «Estou moi feliz de estar na casa», recoñece.

Futbolingalicia: O Cedeira protagonizou a gran goleada da xornada ao vencer por 1-5 no campo do Orillamar. Que valoración fas do partido?

Rafael Florin: «Penso que marcar tan rápido nos axudou moito. Agora estamos con moita confianza e, se ademais acertamos de cara á portería, é moito máis doado sacar adiante os partidos».

FIG: No apartado persoal, anotaches dous goles, o primeiro deles no primeiro minuto. Como valoras o teu rendemento?

RF: «Síntome satisfeito e feliz por poder axudar os meus compañeiros. A nivel persoal, intento achegar moito traballo, intensidade e, o máis importante, goles. Para iso volvín ao club, así que estou contento co partido».

FIG: Como te estás a sentir no teu regreso ao Cedeira, o equipo da túa vila?

RF: «Pouco a pouco estoume sentindo mellor cada día que pasa, pero o feito de compaxinar os adestramentos co traballo dificulta a posta a punto. De feito, apenas fixen pretempada por motivos laborais e por algunhas molestias físicas. Con todo, penso que imos mellorando co paso do tempo».

FIG: O club encabeza o grupo 1. Que valoración fas deste inicio de liga?

RF: «O inicio de tempada é moi bo. Estamos nunha boa dinámica, sabemos o que temos que facer e as cousas están a saír ben. Pero tamén é certo que a competición é moi longa e que teremos momentos malos. Temos que sumar o máximo posible e non deixar de traballar».

FIG: Cal é o obxectivo do Cedeira este ano?

RF: «Seguir nesta liña e sumar o máximo posible. Se co paso das xornadas vemos que podemos aspirar a máis, tentaremos conseguilo. Pero, polo de agora, trátase de sumar de tres en tres e o tempo dirá».

FIG: Que esperas do partido desta fin de semana ante o San Sadurniño?

RF: «Esperamos un partido complicado. É un encontro contra un rival da comarca, polo que ten ese plus de motivación. O Sansa, aínda que vén de ascender, é un equipo ben traballado e non vai ser un partido doado. Si é certo que xogar na casa ten que ser unha vantaxe para nós, e tentaremos aproveitala».

FIG: Que motivos te levaron a volver ao Cedeira?

RF: «Foi un pouco a suma de varias circunstancias. O feito de empezar a traballar na vila foi moi importante, claro, pero tamén o de non ter que desprazarme a diario. Ademais, o interese do club en que volvese, formase parte importante do cadro de xogadores e axudase a mellorar o equipo fixo que decidise regresar». 

FIG: A tempada pasada conseguiches o ascenso co Galicia de Mugardos, anotando once goles. Como valoras ese curso?

RF: «Foi unha experiencia moi boa. É certo que ao principio nos custou un pouco, pero, a medida que avanzou a competición, fomos a máis e conseguir o ascenso foi moi gratificante. A nivel persoal, penso que a miña tempada foi de menos a máis e que, na parte final, puiden axudar os compañeiros a conseguir o obxectivo marcando goles importantes, polo que me sinto moi orgulloso».

FIG: O teu mellor ano como sénior foi o anterior, no As Pontes, con 16 goles. Que recordas daquela tempada e da túa formación como xuvenil no Val ou no Calasanz?

RF: «O ano no As Pontes foi unha tempada de aprendizaxe e mellora. Non foi doada por distintas circunstancias, pero conseguir a permanencia cando ninguén daba nada por nós e marcar goles importantes fai que sexa un ano difícil de esquecer. En canto á etapa xuvenil, tamén xoguei no Cedeira e no As Pontes, ademais do Val e do Calasanz. Foron etapas nas que penso que me axudaron a mellorar e a ver o fútbol dunha maneira máis competitiva e non tan lúdica.».

FIG: Que significa para ti o Cedeira, o club no que pasaches grandes tempadas na base e un gran primeiro ano como sénior, con dez goles?

RF: «Sobra dicir que é o club da miña vila e iso sempre é especial. Xoguei aquí desde moi pequeno e compartín equipo cos meus amigos de sempre. O meu irmán pequeno tamén está no club desde hai moitos anos e hai moita xente que sente o Cedeira e que se alegra de que estea de volta. Todo iso faime sentir ben e estou moi feliz de estar na casa. Se podo axudar a que o club medre e a que a xente estea contenta, doume por satisfeito.».