A falta de pouco máis dunha semana para o comezo da liga, a gran maioría dos equipos da Preferente Sur parecen pechar o seu cadro de persoal cos últimos retoques deste mercado. Outros, que non avanzaran a configuración do seu persoal en redes sociais, tamén deron a coñecer aos futbolistas que defenderán a súa camiseta coa tramitación das primeiras fichas.

No sétimo episodio do Diario dun Mercado de Preferente Sur, Futbolingalicia repasa os movementos producidos nos clubs desta categoría desde o anterior capítulo desta sección, publicado o último día do mes de xullo.

Primeiras fichas

A pesar de non facer oficial en redes todos as súas novidades deste mercado, tanto o Atios como o Pontevedra B, rivais na primeira xornada, xa deron pistas dos seus equipos coa tramitación das súas primeiras fichas. Os do Porriño contarán con Javi Besada, Sergio Blanco, Rubén Carrera, Rubén Domínguez, Héctor, Pablo González, Cristian López, Sergio Loureiro, Iván Martín, Edu Otero, Iago Pérez, Xoel, Aitor, Marcos e Rodrigo Vázquez.

O filial granate viviu un verán de revolución e só tres xogadores continuarán na Boa Vila: Tonio Otero, Pedro Ares e Sergio Balea. A estes tres futbolistas sumaranse Adri Alonso, Hugo Álvarez, Berdonce, Sergio Canosa, Covelo, Pedro Espiña, Jose Ramón, Iago Outeiriño, Manu Galego, Raúl Gil, Raúl González, Diego González, Graumann, Mateo Lago, Anxo Chairos, Jacobo, Jairo, Marqués, Salgado e Juan Pablo.

Varios anuncios

O Porriño Industrial foi a entidade que máis anuncios fixo neste último mes ao facer oficial a doce novos futbolistas que xogarán como locais no Lourambal. Rubén González incorpora a Lago, Xusto, o gardameta Nucho, Durán, Edu, Samu Vilariño, Mario, Chinés, Pablo Arnosi, Alex Pacheco, Iván Caride e ao porteiro Iván Comesaña. Ademais, o club anunciou as renovacións de Maykel e de Diego.

Con menos cantidade de novidades, pero con máis dun movemento aparecen o Barco e o Xuvenil de Ponteareas. O conxunto valdeorrés deu un golpe sobre a mesa coas renovacións dun dos seus piares como Rubén García e de Marcos Vilachá. Ademais, os de Calabagueiros pactaron co Cented Team a cesión de Ariel Herrera.

Pola súa banda, o equipo de Pardellas confirmou a continuidade do defensor Ángel Villar e a chegada de catro caras novas. Ramiro Sorbet poderá contar baixo as súas ordes con Puyuelo, Adrián Fernández, Javi Silva e o experimentado gardameta Diego Pérez.

Movementos puntuais

Cos cadros de persoal practicamente pechados, houbo nove clubs que anunciaron un só movemento neste mes, co que, probablemente, pechen os seus equipos. É o caso do Verín, que fixo oficial a chegada de Pablo García, do Atlético Arnoia, que incorpora a Charly, ou do Portonovo, ao que chega o dianteiro ucraíno Tymo (na imaxe adestrando co primeiro equipo do Arosa na pretempada) procedente do Arosa xuvenil.

Pero os movementos puntuais non cesan aí, xa que as novas condicións ofrecidas polo Rápido de Bouzas ao seu anunciado cadro de xogadores non foron aceptadas, sairán a competir co seu filial de Terceira Galicia, e moitos xogadores buscaron acomodo noutros equipo. O Cambados sumou ao seu equipo a Alberto Estévez, o Moaña fixo o propio co talentoso lateral Jesús Varela, o Umia fichou a Adrián Cacheda e o Choco incorporou a Marcos Torres.

Os movementos de maior calidade chegaron no Atlántida de Matamá e no Céltiga. O club vigués asinou a unha das sensacións do Preferente Sur do curso pasado como Hugo Fariña, que acabou descendendo co Alertanavia. Pola súa banda, o equipo da Illa está a contar nesta pretemporada co lateral Sergio Abal, con experiencia no filial do Pontevedra e que chegou a debutar en Primeira RFEF, aínda que, polo momento, non é oficial.

Foto: Arosa SC