A xornada deixou movementos importantes na loita polos postos de promoción da Terceira Federación galega. O Boiro volveu a gañar, mentres que o Arteixo e o Silva aproveitaron os seus triunfos para entrar na zona de play-off. Pola súa banda, o Barco continúa sumando e mantense entre os equipos que ocupan postos de promoción.

O Boiro volveu á senda da vitoria cun 3-0 ante o Arenteiro. Os ourensáns aguantaron durante a primeira metade, pero tras o descanso os goles de Óscar González, Mario Prol e Gonzalo Landeira permitiron que os tres puntos quedasen na Barraña. O conxunto boirense mantén así o liderado con cinco puntos de vantaxe.

A Sarriana tamén asinou unha importante vitoria por 3-1 ante o Pontevedra B. Os visitantes comezaron mellor e Sandro Benlloch adiantounos no primeiro tempo. Porén, os sarriáns reaccionaron tras o descanso e igualaron grazas a un gol en propia meta. Xa nos últimos intres, Iago Parga puxo por diante a Sarriana desde o punto de penalti e Álex Pérez marcou o terceiro para sentenciar o encontro. O triunfo permite aos sarriáns volver á segunda posición.

Vitorias importantes na loita pola promoción

O Atlético Arteixo continúa coa súa boa dinámica e xa se mete nos postos de play-off tras vencer por 2-0 ao Lalín. Antonio López e Jairo Rivero asinaron os goles dun triunfo que deixa o conxunto arteixán na zona de promoción e afasta o Lalín deses postos privilexiados.

Tamén se mete na loita pola promoción o Silva, que venceu por 0-1 ao Antela, un dos equipos revelación desta temporada. O encontro estivo moi igualado e decidiuse cun único tanto, obra de Rodri Parafita no minuto 70. O gol permitiu aos coruñeses sumar tres puntos importantes e situarse nos postos de play-off, a un punto da Sarriana.

O Barco segue sumando

O Barco continúa nos postos de privilexio a pesar da recente marcha do seu adestrador, Agustín Ruiz, que se incorporou á UD Ourense, en Primeira Federación. Nesta xornada, os valdeorreses empataron 1-1 ante o Céltiga nun encontro que se decidiu tras o descanso. Cellerino adiantou o conxunto arousán e, vinte minutos despois, Raúl Paz estableceu a igualada.

En cambio, o Racing Villalbés sae dos postos de promoción tras caer por 1-2 ante o Somozas. Os lucenses adiantáronse no marcador cun gol de Borja Míguez, pero os ferroláns reaccionaron tras o descanso. Asier Santalla, desde o punto de penalti, igualou o encontro e Aldán Naval marcou o tanto definitivo para darlle os tres puntos ao Somozas.

O Atlético Montañeros continúa sen levantar cabeza e xa encadea tres xornadas sen sumar. Nesta ocasión, os coruñeses caeron por 1-3 ante o Portonovo en Elviña. Os visitantes adiantáronse no minuto 2 e chegaron ao descanso con vantaxe. Na segunda metade, Iker Escudero ampliou a diferenza, aínda que Axel Sánchez conseguiu recortar distancias para o Montañeros. Xa sobre a bocina, Eloy Rosal marcou un auténtico golazo para pechar o triunfo visitante.

O Estradense sumou o seu segundo empate consecutivo nun encontro no que volveu deixar escapar puntos nos últimos minutos. Daniel Pedrosa puxera o partido de cara para os locais no minuto 80, pero Julius Avinu igualou no 90 para repartir os puntos.

Pola súa banda, o Viveiro conseguiu unha importante vitoria por 1-0 ante o Alondras, grazas ao gol de Sergio Baamonde. O conxunto viveirense tivo que afrontar toda a segunda metade con dous xogadores menos, pero foi quen de conservar a vantaxe ata o final.

FOTO PORTADA: SD SILVA