O Bergantiños FC acadou a pasada tempada o tan desexado ascenso á Terceira RFEF. Tras 3 anos ás portas de subir á categoría nacional conseguían o seu premio ante o Tomiño FCF na final do playoff.

Malia a ilusión do desafío, o salto de competición está semellando máis difícil do agardado por todos. A piques de disputarse a oitava xornada, as de Bergantiños aínda non conseguiron puntuar en ningún dos encontros.

Un inicio complicado

A estrea nunha categoría de maior nivel adoita pór a proba a capacidade de adaptación dos equipos, e o Bergan está experimentando de primeira man o difícil que iso pode ser. Ao longo das primeiras sete xornadas, o equipo non foi capaz de imporse a rivais que, na súa maioría, contan con maior experiencia nesta división.

En varias ocasións o combinado vermello quedouse ás portas de acadar os puntos. Un tanto de Noelia Gómez ante o Victoria CF abría o contador histórico en categoría estatal. Ese gol non foi suficiente e o encontro pechouse cun 2-1 a favor das de Coruña.

No último encontro ante o filial do Oviedo tampouco conseguiron rascar puntos. Encaixaron o primeiro gol no minuto 7 e caeron finalmente derrotadas por 1-4.

O desafío: manter a moral alta

Este inicio non foi o desexado pero o Bergantiños ten por diante 23 xornadas para reverter a situación. O salto de categoría non só implica unha adaptación táctica, pois en momentos delicados como este o factor psicolóxico é chave.

As xogadoras enfróntanse á presión de non puntuar e, a ansiedade por facelo, aumenta a cada partido. O xogo e a cohesión do equipo dirixido por Pastoriza está sufrindo unha evidente melloría malia que os resultados non acompañen. O equipo continúa a traballar para atopar a fórmula que lles permita competir de maneira máis efectiva. Fortalecer a cohesión, tanto en ataque como en defensa, e conseguir pechar os encontros.

Un equipo con calidade dabondo

Nestes momentos, o traballo en equipo é crucial pero tamén é importante contar con nomes que destaquen individualmente e o Bergantiños os ten. Podemos falar da porteira Andrea Amil, con experiencia en categorías nacionais tras xogar en Segunda Federación co Interrías e en Terceira Federación co Victoria CF.

Amil xa militou no Bergantiños, onde conseguiu ser a porteira menos goleada da Primeira Galega. Incorporouse de novo este ano ao equipo carballés tras desfrutar da experiencia na Queens League no equipo do Rayo de Barcelona.

A portería está cuberta e para os goles teñen varios nomes. Esta tempada Noelia Gómez está sendo a máxima anotadora do equipo con 4 tantos. O pasado ano marcou 17 goles co Orzán e decidiu incorporarse ao proxecto do Bergan. Se falamos de goles non podemos non nomear a Cruz Sánchez, capitá e pichichi do equipo. Dende o ascenso do equipo á Primeira Galega na tempada 2020-2021 suma máis de 70 goles en liga.

No centro do campo a continuidade de xogadoras como Laura Caamaño e Alba Villar entre outras, poden dar ao equipo ese punto de estabilidade necesario.

Moitos partidos por disputar

O Bergantiños ten por diante unha serie de partidos tan importantes como complexos. Desprazamento a Toro esta fin de semana, encontro ante o pechacancelas da categoría e logo enfrontamento ante o líder. Deste xeito, a folla de ruta para puntuar nalgún partido das próximas tres xornadas pasa por Bovedana, Parquesol e Dépor B.

Cada xornada ofrece unha nova oportunidade, e malia que os resultados non acompañasen ata o de agora, o equipo ten as ferramentas para saír adiante. A experiencia das xogadoras máis veteranas e o talento das novas incorporacións serán chave para poder estrear o seu caixón de puntos.