A SD Negreira é o equipo en mellor forma dos dous grupos que conforman a Preferente Futgal en Galicia, encadeando cinco triunfos seguidos. Buscarán alargar esta boa dinámica no día de mañá ante o Escairón no Municipal Jesús García Calvo.
O Negreira iniciou a xeira a última fin de semana de outubro vencendo por 3 a 0 á SD O Val. Os autores dos tantos foron Antón Rial, Fran Sanín e Alberto Freire.
O Cidade de Ribeira foi o seguinte rival en sufrir o gran momento do Negreira. Os goles de Juan Caamaño, Joel Lagares e Joseph supuxeron a vitoria por 1 a 3 a domicilio.
O Lemos e o San Tirso visitaron o feudo do Negreira en domingos consecutivos e non foron capaces de sacar un resultado positivo, 2-0 e 2-1 respectivamente.
A fin de semana pasada o Negreira viaxou ante Pol, onde logrou un novo triunfo por 1 a 3. No día de mañá, de novo diante da súa afección, buscarán a sexta vitoria consecutiva para continuar na loita por entrar nos postos de promoción.
Actualmente o equipo do Municipal Jesús García Calvo está situado na oitava plaza do grupo I da Preferente Futgal. Conta con 21 puntos de 36 posibles tras obter 6 vitorias, 3 empates e 3 derrotas.
