O futuro inmediato do CD Arenteiro segue envolto nunha nube de incerteza que mantén en alerta á Terceira Federación. O club do Carballiño conseguiu realizar o pagamento da débeda que mantiña co seu cadro de xogadores, unha cantidade que superaba os 69.000 euros, unhas horas antes de que rematase o prazo establecido pola Real Federación Española de Fútbol.

A operación evita, polo menos de momento, o peor escenario posible: quedar sen poder competir e ver comprometida a súa continuidade na categoría.

Con todo, a situación está lonxe de estar resolta. A entidade necesita agora que a RFEF levante o bloqueo dos seus servizos federativos e autorice a tramitación das licenzas dos xogadores e do corpo técnico.

Ata que ese paso se confirme oficialmente, o Arenteiro segue sen plena capacidade para planificar a tempada con normalidade.

O verán do conxunto verde converteuse nun auténtico quebracabezas. Xa sufrira o club consecuencias deportivas pola súa delicada situación administrativa. Por exemplo, a suspensión do encontro da Copa Federación, e mesmo o primeiro amigable da pretemporada estivo marcado pola excepcionalidade. O Arenteiro ía xogar ante a UD Ourense o Trofeo Festa do Pulpo. Pero acabou por medirse ao Pontevedra, un partido que perdeu por 0-3, ao caer do cartel os ourensáns polos problemas federativos do Arenteiro.

Mentres outros clubs avanzan na confección dos seus cadros de persoal, no Carballiño a actividade principal continúa nos despachos. A prioridade foi cumprir co requisito económico esixido pola Federación, pero a sensación é que o episodio está lonxe de pecharse. O desenlace do chamado ‘caso Arenteiro’ pode ter efectos máis alá do propio club, xa que varias entidades seguían con atención a evolución do expediente, pendentes dunha posible vacante na categoría. É o caso do Cambados.

Pouca información

Chama especialmente a atención o contraste entre a gravidade da situación e a comunicación pública da entidade nas redes sociais e na súa páxina web. Nas últimas horas, o Arenteiro mantivo silencio en redes sobre o pagamento da débeda e sobre o estado do procedemento federativo.

A única publicación realizada nas súas contas foi unha campaña comercial da tenda oficial, anunciando descontos de entre o 30% e o 40% en camisetas, roupa de adestramento e outros produtos do club.