A tempada 2024/2025 xa é historia, e os equipos galegos que militan en Segunda RFEF feminina comezan a dar os primeiros pasos na confección dos seus novos proxectos. Con altas, baixas e renovacións confirmadas, As Celtas, o Dépor B e o Atlético Villalonga comezan a mover ficha de cara ao curso 2025/2026.

Facemos un pequeno repaso de como está o mercado de Segunda RFEF neste comezo de xullo.

Atlético Villalonga un novo fin de ciclo

O conxunto de Sanxenxo viviu unha tempada marcada pola polémica extra deportiva. Así e todo, o equipo acadou unha digna sexta posición, pechando o ano con certa estabilidade futbolística e bo nivel competitivo.

Con todo, a remodelación será importante. Xa se confirmaron as saídas das dúas porteiras: Patricia Curbelo e Eva García. Esta última fichou polo CD Castellón, destino ao que tamén se incorpora Dolores Okenve, outra das xogadoras do Villalonga que emprende novo reto.

Agárdanse a confirmación de máis saídas nas vindeiras semanas, mentres se perfila a estrutura do novo proxecto deportivo. Un novo fin de ciclo nunha categoría na que contarán con maior presenza galega, As Celtas e Dépor B.

Dépor B: promoción interna tras unha gran tempada

O filial branquiazul completou unha campaña sólida, coa mirada posta sempre na formación e proxección das súas xogadoras. Como mostra do bo traballo feito, dúas futbolistas clave do curso pasado, Paula Monteagudo e Elena Vázquez, recibiron a recompensa de subir ao primeiro equipo, que acadou a permanencia na Liga F. Un paso adiante na súa carreira que tamén evidencia a confianza do club no talento da súa base.

Polo de agora, non transcenderon máis nomes sobre o futuro inmediato do filial, pero non se descartan cambios nun plantel que sempre combina xuventude, talento e ambición.

As Celtas: sorpresas e continuidade

O equipo vigués viviu un debut soñado na categoría nacional, coa permanencia asegurada e unha identidade recoñecible dende o primeiro minuto. Agora toca reformular o vestiario: cinco baixas confirmadas, incluída a de Camila Pescatore, unha das xogadoras máis destacadas do ano e que sorprendeu aos afeccionados. Tamén din adeus ao conxunto celeste Noelia Pereira, Nuria Gómez (que colga os guantes), Eva López e María Calvar.

A boa nova para os celtistas é que Vicky Vázquez seguirá á fronte do banco, acompañada polas renovacións xa confirmadas de Lara Martínez, María Figueroa e Ana Toubes, que seguirán sendo pezas importantes no esquema dun equipo que aposta pola continuidade da súa filosofía.