Hai unha novidade esta xornada en todos os partidos do fútbol galego, un protocolo de saúdo fair play. A Real Federación Galega de Fútbol pono en marcha a través da Comisión contra a Violencia no Fútbol Galego días despois de que se producise unha agresión a un colexiado nun partido de veteráns en Lugo.
Segundo a información da Federación, esta acción realizarase antes do comezo de cada partido. Os dous equipos, os seus cadros técnicos e o equipo arbitral fan un saúdo conxunto de fair play.
O obxectivo, aseguran, é «visibilizar o respecto entre todas as persoas que participan no partido e transmitir esa mensaxe á afección desde o primeiro minuto».
O saúdo, paso a paso
- Saída en dúas filas mesturadas, cun xogador de cada equipo en cada parella.
- Fila única no medio do campo, intercalados, co árbitro no centro (e o asistente 2 xunto a el, se hai trío).
- Técnicos e oficiais mesturados a 5 metros do banco; adestradores xuntos e abrazados (e o asistente 1 con eles, se hai trío).
- 20 segundos aliñados e firmes.
- O árbitro asubía.
- Saúdo fair play: todos dan a man aos rivais que teñen ao lado.
PREME AQUÍ PARA VER O PROTOCOLO
