O Ribadeo leva anos consolidando un proxecto forte na Preferente Galicia. A entidade celeste tocou a Terceira División hai menos de dez anos, e no Pepe Barrera téñeno claro: o obxectivo é voltar á categoría nacional. Porén, a empresa non é doada. A Preferente sempre aglutina equipos con altos presupostos, moita tradición, afeccións moi comprometidas…

De feito, os mariñáns entraban en todas as quinielas como candidatos ao ascenso o pasado curso, pero a competición e a dificultade da liga puxeron ao Ribadeo nunha situación delicada, coqueteando co descenso boa parte da temporada. Dani Moirón dimitiu e ‘Pichi’ chegou ao banco para dar tranquilidade. Unha vez rematada a competición regular, Dani Moirón volveu ao club en calidade de director deportivo para reforzar o proxecto na ría do Eo.

Novo adestrador en Ribadeo

Unha das primeiras fichaxes de Moirón foi o novo técnico: Ramón Labrada deu o salto desde o Meira da Primeira Galicia cara un conxunto máis que consolidado na Preferente. O novo preparador é consciente da responsabilidade que ten á fronte dos mariñáns, pero tamén se mostrou ilusionado co reto, no que estará acompañado no banco por Juamma García.

Futbolingalicia: Como se produce a túa chegada ao club?

Ramón Labrada: En Ribadeo entrou unha nova directiva, cun proxecto que abrangía a Dani Moirón como Director Deportivo. En canto se oficializou a chegada desta nova dirección, Moirón falou conmigo e todo foi moi rápido e doado. Apetecíame a chamada dun equipo como este e dunha categoría como a Preferente.

Fig: Que agardas da temporada no Pepe Barrera?

RL: O obxectivo que marca a directiva é manter a categoría. A medio prazo, a idea é ter un equipo competitivo da xente da base. Actualmente hai sobre 250 cativos no fútbol base, están cambiando cousas tamén aí… Dani coordinará o Fútbol 11 e os esforzos irán da man. Desde o corpo técnico somos ambiciosos, queremos chegar en boas condicións ao primeiro partido de liga para competir cada domingo contra calquer rival e, a partires de aí, ver a onde nos leva a competición.

Fig: Apostarás entón pola canteira?

RL: É un proceso que leva tempo, pero que cheguen rapaces de Ribadeo ao primeiro equipo e combinalo con xogadores que estean contrastados na categoría. Hai que aunar todo iso, manter a categoría e que o día de mañá a vila teña un equipo en Preferente no que xogue a xente da casa.

Fig: Que fútbol van ver os seareiros do Ribadeo este curso?

RL: Renovamos seis xogadores importantes, pero o equipo sufriu unha renovación. Estamos pechando o equipo aínda, quedan 3-4 pezas por traer… e iso vai condicionar a forma do equipo e o estilo que se lle dea ao xogo. Como adestrador, hai que adaptarse aos xogadores que ten o cadro.

Fig: Como están as instalacións antes de comezar a pretemporada?

RL: No Pepe Barrera están facendo labores para que chegue ben ao Emma Cuervo, e seguramente estea ben na temporada. No campo da Devesa xa remataron de traballar e ten moi boa pinta, está en moi bo estado. Hai algún campo máis pola zona, artificiais… non creo que teñamos problema no plano das instalacións este curso.