O actual primeiro chanzo das categorías nacionais viviu diferentes cambios neste pasado 2024. Repasamos o remate da pasada campaña e a reconfiguración da competición cos equipos que permaneceron na categoría.

Comentaremos tamén a situación na que se atopan neste novo ano os equipos tendo en conta que mudou o sistema de competición. Na actualidade, dous equipos son os que ascenden de forma directa e o terceiro pasa a disputar unha promoción de ascenso.

O remate da tempada 2023-2024

No grupo 1 onde se atopan os equipos galegos, era o Avilés quen conseguía o ascenso directo á Segunda RFEF. O Umia despedíase da categoría nacional tras cinco anos e o Bergantiños foi quen ocupou a súa praza tras gañar ao Tomiño FCF na final de ascenso a Terceira.

O filial deportivista finalizaba a tempada en segunda posición, un gran ano do Lóstrego que acadaba o cuarto lugar e empatado a puntos co Sárdoma. De seguido, o Friol o Mos e o Victoria FC. Na parte baixa, a loita pola permanencia gañouna o Lugo no último suspiro.

Situación actual neste 2025

Tal e como está a clasificación, augurase unha segunda volta que manterá a emoción ata o final. Na loita polo ascenso, o Dépor ‘B’ (37 puntos) é quen lidera a clasificación. A súa regularidade e un par de tropezos do CD Olímpico de León (36 puntos), fixeron que as de Coruña se coroasen como campioas de inverno.

A esta loita súmanse tamén As Celtas (35 puntos), Sárdoma (35 puntos) e CD Villa de Simancas (33 puntos). As celestes son as que levan a mellor racha cun pleno de vitorias nos 5 últimos encontros e sendo imbatibles na Madroa.

Na zona media da táboa están o Friol (29 puntos), a Bovedana (27 puntos), Victoria CF (24 puntos), Lóstrego (23 puntos), Victoria FC (17 puntos), Sporting de Gijón ‘B’ (14 puntos) e Oviedo ‘B’ (13 puntos). Os Victorias e as de Gondomar están sendo os equipos menos regulares, sen contar os da zona baixa, e precisarán seguir sumando de 3 para no perder posicións.

Na parte crítica, o Parquesol (-1 punto) e o Romanón (1 punto) son os equipos máis descolgados con diferenza, pero na loita pola permanencia non hai nada decidido. Lugo e Bergantiños atópanse empatados a 9 puntos, sendo as lucenses as que se manteñen fóra dos postos de descenso.

Momentos destacados da tempada

• Unha loita de poderío entre Olímpico e Dépor: A capacidade de ambos conxuntos para dominar os partidos e manter certa regularidade convérteos nos principais candidatos ao ascenso.
• A irrupción viguesa: Sárdoma e As Celtas están sendo dous equipos revolución, con gran solidez e con moitas ganas de soñar co ascenso a Segunda.
• A dificultade dos ascendidos: Equipos como o Bergantiños están enfrontándose ao desafío de competir nunha liga máis esixente. Papel que xa viviu o Lugo que agora, con máis experiencia, sigue tratando de asentarse na categoría e afastarse da zona de perigo.