No Racing Villalbés non perden o tempo e anunciaron as baixas de Nathaniel, que xogará en Primeira RFEF co CD Lugo, Quico, Torrado, Adri Carrión e Ibrahima, que gozou de poucos minutos por mor dun xeonllo danado.
Mais non todo vai de saír. López é a primeira renovación e portará un ano máis o brazal de capitán. Make e Vérez, o segundo aínda recuperándose dunha grave lesión, continuarán vestindo a camisola verde e vermella. A meta seguirá cuberta polo madrileño Álex Santomé. Ademais, onte coñecemos a primeira fichaxe do Racing. O pichichi do Castro Fito Periale deixa a Preferente para converterse nunha das claras referencias ofensivas vilalbesas.
![](http://futbolingalicia.es/wp-content/uploads/2024/06/LOPEZ-CAPITAN-VILLALBES-1024x1024.jpg)
No banco da Magdalena xa contan con novo preparador. Alberto López recala na Chaira tras asinar dúas permanencias consecutivas cun Viveiro repleto de xogadores mozos e moi limitado no aspecto económico en comparación cos seus rivais.
Juanjo Vilachá será o preparador da UD Barbadás tras o peche de ciclo do club con Agustín Ruiz. Afrontará a súa segunda etapa como adestrador do primeiro equipo, no que xa estivo entre o 2018 e o 2019. O coñecemento do funcionamento da institución de seguro que será unha garantía de cara á planificación do vindeiro curso futbolístico. A Valenzá abre o capítulo da continuidade con Xinzo. O dianteiro cumprirá así o seu tercer curso futbolístico en Os Carrís.
![](http://futbolingalicia.es/wp-content/uploads/2024/06/juanjo-vilacha-mister-barbadas.jpg)
Cumprir os obxectivos adoita ser sinónimo de premio. O galardón chégalle a Gonza Fernández, que permanecerá un ano máis no Alondras tras ampliar o contrato que lle une aos de Cangas. A gran primeira volta que fixo o equipo de seguro que tivo certo peso na decisión. A mesma fortuna correu Álex Suárez no Betanzos, co que renova tras lograr unha complicada salvación nunha ardua loita con múltiples implicados.
Noutro punto da xeografía de Pontevedra o preparador tivo diferente sorte. O Arosa non foi quen de superar a eliminatoria de semifinal galega polo ascenso a Segunda RFEF ante a UD Ourense e poucos días despois Luisito deixou de ser o seu técnico tras máis de dúas campañas na Lomba.
![](http://futbolingalicia.es/wp-content/uploads/2024/04/banner-870x250-1.jpg)