Tras a conclusión de todas as ligas e das fases de ascenso do fútbol galego, a tempada 2026/27 comeza xa a tomar forma. Sen apenas tempo para o descanso, clubs e afeccións teñen a vista posta na planificación do novo curso, tanto na confección dos cadros de xogadores como na composición dos diferentes grupos.

Na Primeira Futgal, á espera de posibles renuncias e da resolución definitiva do coñecido como Caso Arenteiro, os 108 equipos con dereito a competir na categoría agardan pola configuración dos seis grupos. Habitualmente, estes elabóranse agrupando os 18 equipos máis próximos aos extremos xeográficos de Galicia, mentres que os 36 restantes repártense entre os dous grupos centrais. Tendo en conta este criterio, a distribución podería ser a seguinte:

Grupo 1

Este grupo adoita estar integrado por equipos das delegacións da Coruña e Ferrol. Mantendo o criterio da pasada tempada, continuarían nel o Sporting Meicende, Orillamar, Olímpico, Eume Deportivo, Sporting Cambre, Perlío, Meirás, Relámpago, Cedeira, Torre, Marte, Sporting Coruñés e Imperator, un total de 13 conxuntos que conservaron a categoría.

A eles uniríanse os descendidos da Preferente Norte: Victoria, O Val de Narón e Cultural Maniños, así como os ascendidos desde Segunda Futgal: Numancia de Ares, Juvenil de Almeiras, Sada e San Sadurniño. En total serían 20 equipos das delegacións da Coruña e Ferrol, polo que dous deles deberían cambiar de grupo.

Grupo 2

Todo apunta a que este grupo absorberá eses dous equipos excedentes, xa que tradicionalmente combina clubs da Coruña, da Costa da Morte e do norte da delegación de Santiago.

Ademais do Club de Mar de Caión, que repetiría neste grupo, conservaron a categoría Calo, Bertamiráns, Cacheiras, Muxía, Vizoño, Praíña Sporting Club, Queixas, Racing San Lorenzo, Tordoia, Castriz e Bastavales. Xunto aos ascendidos SD San Lorenzo, Luaña e Xallas, sumarían 17 equipos.

Por iso, sería necesario incorporar un conxunto máis da delegación de Santiago. Os principais candidatos estarían a pasada campaña no grupo 5 e serían Flavia, Abanqueiro, Unión de Asados ou o Cidade de Ribeira, recentemente descendido da Preferente.

Grupo 3

O denominado grupo lucense mantería a Monterroso, Ribadeo, Residencia, Racing Villalbés B, Atlético Escairón, Milagrosa, Guntín, Chantada Atlético, Lourenzá, Foz, Santaballés, Outeiro de Rei, Oural e Taboada. Co ascenso de Folgueiro e Becerreá alcanzarían os 16 equipos, polo que faltarían dous máis. Os candidatos naturais serían Boimorto e Cire de Melide, que a pasada campaña competiron no Grupo 2 e poderían cambiar para equilibrar a distribución.

Grupo 4

O grupo ourensán é, probablemente, o que presenta menos incógnitas, xa que suma exactamente 18 equipos tras ascensos e descensos. Continuarían Córgomo Vilamartín, Sporting Carballiño, Nogueira de Ramuín, Velle, Monterrei, Maside, Polígono San Cibrao, Muíños, Loñoá, A Peroxa, Maceda, Francelos, Brollón e La Purísima. A eles engadiríanse os ascendidos Rayo 21, Atlético Vilariño e Lemos B, ademais do descendido Sporting Celanova.

Grupo 5

Á espera de coñecer que equipo da delegación de Santiago reforza o Grupo 2, o Grupo 5 tamén sufriría poucos cambios. Xunto a tres dos catro equipos mencionados anteriormente (Flavia, Abanqueiro, Unión de Asados ou Cidade de Ribeira), continuarían Cordeiro, San Martín, Arcade, Ponte Caldelas, Campo Lameiro, Marcón Atlético, Caldas, Sport Team Estrada, Atlético Cuntis e Amanecer.

A eles uniríanse o descendido Umia e os ascendidos Lamela, Monteporreiro, Atlético Combarro e Soutomaior. Precisamente este último podería intercambiar o grupo con Domaio ou Vilaboa, aínda que todo apunta a que finalmente será o Soutomaior quen compita no Grupo 5.

Grupo 6

Salvo esa posible permuta entre Soutomaior, Domaio e Vilaboa, este tamén parece un dos grupos máis definidos. Nun principio estaría integrado por dous deses tres equipos, ademais de Gondomar CF, Sporting Guardés, Vila de Corpus, Rápido de Bouzas, Racing Castrelos, Mos, Chaín, Progresista, Caselas, Ribera e Tomiño. Completarían o grupo os descendidos Tyde e Choco, xunto aos ascendidos Erizana, Mosende e San Roque.

Caso Arenteiro

O descenso administrativo do Arenteiro a Terceira RFEF podería provocar un importante efecto dominó na Primeira Futgal, aínda que as resolucións de competición xa foron publicadas.

Se finalmente o Arenteiro sae a competir en Terceira RFEF e a Federación decide non ampliar a 19 equipos o grupo da categoría, o Silva descendería a Preferente, o Auriense (antigo Cented Academy) baixaría á Primeira Futgal e o Amanecer perdería a categoría, regresando á Segunda Futgal de Pontevedra. Como consecuencia, o Vilanova FC tamén vería frustrado o ascenso celebrado desde Terceira Futgal.

Neste escenario, o Auriense ocuparía unha praza no Grupo 4, o que obrigaría a unha nova reorganización: o Lemos B pasaría ao Grupo 3, o Boimorto ao Grupo 2 e o equipo da delegación de Santiago que inicialmente debía incorporarse a ese grupo (Cidade de Ribeira, Flavia, Abanqueiro ou Unión de Asados) acabaría ocupando a praza do Amanecer no Grupo 5.

En definitiva, aínda quedan varias incógnitas por resolver antes da publicación oficial dos grupos, pero todo indica que a composición da Primeira Futgal 2026/27 estará moi próxima a este escenario.