O Somozas atravesa un momento excepcional na Terceira RFEF. O conxunto que dirixe Stili suma xa sete xornadas sen coñecer a derrota e encadea cinco vitorias consecutivas, a última fronte ao Noia (1-0) no Alcalde Manuel Candocia, onde non encaixou nin un só gol en toda a tempada.
Por todo isto, o equipo verdibranco está a ser unha das grandes sensacións do campionato, por non dicir o equipo revelación, un adxectivo que outorgará o paso das xornadas. Sitúase no segundo posto da táboa, a tan só un punto do liderado que ocupa o gran favorito, a SD Compostela.
A dicir verdade, o arranque de curso non presaxiaba a situación actual. O Somozas debutou cun empate sen goles ante o Cambados e sufriu unha dura derrota fronte ao Céltiga (5-0). A partir de aí, o equipo de Stili reconstruíuse desde a defensa. En nove xornadas só recibiu seis goles, o que o coloca entre os equipos menos goleados da categoría.
Gran xeira da @ud_somozas na 3ª @futgal
— En Xogo (@EnXogoG) November 2, 2025
📌 7 xornadas sen perder nas que só encaixou 1 gol
📌 5 vitorias seguidas
📌 Non recibiu ningún gol no Candocia (450 min)
⚽️ Asier marcou o tanto do triunfo vs @CFNOIA
Os resumos do fútbol galego, en G24 📲 https://t.co/P6IqrDAcMF pic.twitter.com/2iUotrcx4v
O calendario complícase
Non obstante, a temporada é longa e queda aínda moito por disputar como para pensar en obxectivos maiores. Nos oito partidos que restan da primeira volta, os da comarca de Ferrolterra xogarán ante equipos potentes da parte alta da clasificación, como o Arosa (xornada 11), o Estradense (x. 14) e a SD Compostela (x. 15).
Imaxe de portada: UD Somozas
