A Tercera Futgal entra na súa fase definitiva. Non hai volta atrás. Quedan aínda por coñecerse varios ascensos a Segunda Futgal e todo quedará resolto esta fin de semana coas finais dos play-offs. Iso si, algúns conxuntos afrontan a volta cunha vantaxe considerable tras os resultados da ida.

É o caso do Teixeiro, que ten o ascenso na man e buscará certificalo este domingo no Carregal. Os coruñeses impuxéronse por un contundente 1-4 ao Maravillas no primeiro asalto e parten como claros favoritos, aínda que os locais non renuncian a pelexar polas súas opcións ata o derradeiro minuto.

Tamén chegan con renda favorable tres equipos que lograron unha vantaxe de dous goles. Entre eles está o UC Cee, que venceu por 1-3 no campo do Seaia e que tratará de facer boa esa diferenza este domingo ao mediodía en Sampaio de Refoxos. Os de Malpica están obrigados a remar contracorrente, pero xa demostraron ao longo da tempada que son un rival difícil de dobrar.

Situación semellante vive o Maniños B, que deberá remontar o 2-0 encaixado na ida fronte ao Canido. Nesta ocasión, os ferroláns contarán co apoio da súa afección no Pote e agárranse ao factor campo para intentar darlle a volta á eliminatoria e conquistar o ascenso.

A Terceira de Vigo, Ourense e Pontevedra

Na delegación de Vigo, o Chapela deu un paso importante tras derrotar por 3-1 ao Lavadores. O campo do Meixoeiro ditará sentenza na tarde do domingo nun duelo entre dous equipos que superaron semifinais de gran esixencia. Os chapeláns deixaron polo camiño ao Pontellas, mentres que o Lavadores fixo o propio co Racing Vilariño.

En Ourense, o Barco B quere culminar o traballo diante da súa afección en Calabagueiros. Os barquenses regresaron da ida cun valioso 1-3 fronte ao Soutopenedo, aínda que a eliminatoria segue aberta. Os de San Cibrao das Viñas lograron reducir diferenzas no tramo final do encontro e conservan esperanzas de remontada, mentres que os locais buscarán aproveitar a vantaxe para celebrar o ascenso nun escenario de categoría nacional.

Noalla-Cesantes, caso peculiar

Caso peculiar o que se dá na eliminatoria máis igualada, a que mide a Noalla e Cesantes, que xogan este domingo no campo da Lanzada despois do empate a un gol rexistrado na ida.

Os dous son clubs da delegación de Pontevedra, o que, agás modificacións non previstas, lles asegura o ascenso a ambos os dous equipos independentemente do que pase no campo esta fin de semana. E isto porque ou o Soutomaior ou o Romay ascenderán en play-off (mídense na final) e os dous equipos son da delegación de Pontevedra (Monteporreiro e Combarro xa ascenderan directos).

Deste xeito, para formar un grupo de 16 con equipos da propia delegación, é necesario o ascenso tanto de Noalla como de Cesantes. Con todo, desde os clubs son cautos ata que lles comuniquen a decisión de xeito oficial, como se desprende das súas publicacións en redes sociais, nas que poñen énfase na importancia do partido que se xogará na Lanzada.