A historia da cuarta Copa do Rei da Real Sociedade, conquistada este sábado nos penaltis ante o Atlético de Madrid na Cartuja, tivo o seu primeiro capítulo moi lonxe dos grandes estadios e dos focos mediáticos. Foi en Galicia, no campo do Jesús García Calvo, onde o conxunto donostiarra iniciou o seu camiño cara ao título cun triunfo ante a SD Negreira, nun partido que xa deixaba entrever o carácter competitivo dun equipo que acabaría facendo historia.

Aquel encontro de primeira rolda, disputado o 28 de outubro de 2025, enfrontaba a un modesto conxunto de Preferente galega cun equipo de Primeira División. A diferenza de categoría era evidente, pero sobre o céspede o Negreira non se rendeu en ningún momento e obrigou á Real a traballar máis do esperado para sacar adiante a eliminatoria.

O partido comezou cunha Real Sociedade dominadora, que golpeou cedo cun tanto de Mikel Goti tras unha boa acción de Umar Sadiq, abrindo o marcador nos primeiros minutos. Con todo, o equipo galego respondeu con orgullo, xerando ocasións e chegando a inquietar ao porteiro visitante en varias fases do primeiro tempo, demostrando que non estaba disposto a ser un simple convidado.

Non foi ata a segunda metade cando o conxunto vasco impuxo definitivamente a súa superioridade. Os goles de Zakharyan e Turrientes acabaron por pechar o partido e selar o 0-3 final, nun duelo no que a Real combinou rotacións coa súa calidade habitual.

Primera pedra

Máis alá do resultado, aquel encontro deixou unha imaxe significativa: a dun pequeno club galego competindo con dignidade ante un futuro campión e a dun favorito que, sen excesos, resolveu con seriedade o primeiro obstáculo do torneo. Mesmo no desenvolvemento do partido, a igualdade por momentos e o esforzo local evidenciaron que a Copa segue sendo un espazo onde o fútbol máis humilde pode medirse cos grandes.

Co paso dos meses, aquela noite en Negreira adquiriu un valor simbólico. A Real Sociedade foi superando roldas ata chegar á final e levantar o título tras unha tanda de penaltis pechada por Pablo Marin, culminando unha traxectoria que comezara nun campo modesto de Galicia. Porque, ás veces, as grandes historias non nacen nos grandes escenarios. Esta, a do novo campión de Copa, empezou en Negreira