Repasamos os Diferenciais da Primeira Futgal de FutbolinGalicia da última xornada da liga, que deixou un final de infarto no grupo 1. Houbo cambio de líder e o ascenso a Preferente da Cultural Maniños, que chegaba en segunda posición a este desenlace do campionato. Pero deuselles todo ben:

• Gañaron 0-2 ao Oza Juvenil con dobrete de Hugo Cociña, que lle deu o título e o ascenso ao Maniños e entra na listaxe de Diferenciais como gran destacado da xornada.
• E cumpriuse a outra condición necesaria: o que era líder, o Victoria CF, perdeu 1-0.

O Victoria rematou, polo tanto, segundo, e xogará play-off, como, precisamente, o equipo que lles ganou, o Olímpico. Adrián Ramallo anotou o único gol do partido para selar a participación do seu equipo na fase de promoción.

No grupo 2, o Agolada, que comezou a xornada en descenso, logrou a salvación grazas á remontada conseguida ante o Club do Mar. Pape Samb fixo o gol da vitoria do equipo do Hospitalillo. Pola súa banda, o Vizoño remata a liga en décima posición tras golear 6-3 ao Muxía. Suso Lata anotou un ‘hat-trick’ e non podía faltar entre os Diferenciais.

En terras luguesas, apenas cambiaron as cousas nesta última xornada. A Residencia, que xogará play-off para intentar volver a Preferente, venceu a un Burela que viña de celebrar o ascenso. Jorge Pereira fixo o tanto da vitoria para os da Cheda e remata a liga con 21 goles. Os mesmos que Jairo Campo (Burela) e que Gabriel García, que deu un auténtico recital na vitoria 4-1 do Taboada ante o San Lázaro ao anotar os catro goles do seu equipo.

Resto de grupos

Alfredo Veiga ‘Frodo’ marcou tres goles na malleira do Velle 7-1 ao Córgomo nesta última xornada no grupo 4. Anotou dous Emmanuel na vitoria 3-4 dun Monterrei que quedou a dous puntos de xogar a promoción. Outro par de goles fixo Ismael no grupo 5 para a vitoria do seu Unión de Asados. E tampouco quixo despedir a tempada sen anotar Hugo Suárez, do Puebla, autor dun ‘hat-trick’.

Despedimos este último repaso aos Diferenciais da liga regular da tempada 2024/25 no grupo 6. Xogaban segundo contra campión e foi o líder, o Tyde, o que sumou os tres puntos, ao impoñerse 3-4. Os goles decisivos foron obra de Alberto Rabadán. Como decisivo foi o dobrete de Alberte Lage na vitoria vital da Milagrosa 4-2 ante o Tomiño, un triunfo que permite aos lugueses seguir na categoría.

Doce equipos buscan acompañar ao Maniños

Dous equipos por cada un dos seis grupo, un total de 12 conxuntos, compiten por acompañar a Maniños, Dumbría, Burela, Antela, Puebla e Tyde no ascenso a Preferente. Só poden quedar tres. Xa coñecemos os seis emparellamentos que terá a primeira fase do play-off.

Que son os Diferenciais?

Os Diferenciais de FutbolinGalicia son eses xogadores que anotan goles chave para os seus equipos, para levar os tres puntos, para salvar un empate in extremis… Tamén os que realizan grandes actuacións individuais. Todo iso recoñecemos nesta sección dos Diferenciais, que iremos actualizando xornada a xornada e para a que agardamos contar tamén coa colaboración dos lectores.

Cada xornada, a Primeira Futgal énchenos de emoción e deléitanos con máis de medio cento de partidos. Como ter ollos en todos e cada un dos campos é imposible, agardamos a vosa participación para completar a listaxe dos Diferenciais da Primeira Futgal.

Podes poñerte en contacto con FutbolinGalicia a través de X ou de Instagram.