A Sarriana adiantouse na última eliminatoria autonómica da fase de ascenso a Segunda RFEF. Os de José Antonio Rodríguez gañaron con contundencia na Ribela a un Estradense que non estivo cómodo en ningún momento do partido (2-0).
Un encontro dominado polos locais, que conseguiron adiantarse por medio dun gol de Arona Sané. O atacante estivo moi preciso nunha saída en falso do porteiro Isra fóra da área e fixo o primeiro cun gran disparo por encima dos defensas. Piay faría o segundo no tramo final do encontro nunha boa combinación.
En canto ás posibles baixas para o choque de volta, hai cando menos unha confirmada: a de Miguel, centrocampista do Estradense que acabou expulsado por dobre amonestación. Pola banda da Sarriana, Santi Gegunde (26′) e Arona (58′) marcharon lesionados, co que periga a súa presenza.
Data e horario do partido de volta
A eliminatoria decidirase o vindeiro sábado día 7 ás 19.00 horas nun ateigado Novo Municipal da Estrada, que será seguro un inferno coma aconteceu contra o Noia.
Imaxe de portada: TVG
