O Xuventude Sanxenxo está interesado na vacante existente na Primeira Futgal. O presidente do club, Diego Blanco, admite que o club está disposto a facerse cargo da praza que deixou o Ribadavia en caso de que a Federación llo propoña. Na tempada 2021/22, o Sanxenxo competiu na Preferente Sur e foi caendo ata a Segunda Galicia, categoría na que xa participou a pasada campaña.

«Claro que estariamos interesados«, afirma Blanco. Iso si, explica que terían que «valorar a nivel de directiva» o feito de ter que competir ante rivais da zona de Vigo e o Baixo Miño e non da súa zona, pero di que, de entrada, «non o vemos mal«. «Outros equipos quizais non estean interesandos, pero o Sanxenxo si, porque temos potencial para máis«, sinala o presidente.

En caso de que a Federación lles dea a oportunidade de saír en Primeira Futgal e o Xuventude Sanxenxo finalmente acepte, o presidente do club pensa que non deberían realizar demasiados cambios. «Fixemos un cadro de xogadores para intentar ascender. A maioría dos futbolistas son de Primeira, non de Segunda. Iso non sería un problema, dous retoques a competir«.

Varios clubs non aceptarán

O Xuventude Sanxenxo está no posto 25 na listaxe de equipos aos que a Federación dará a oportunidade de asumir a praza que deixou vacante o Ribadavia Atlético. O conxunto ourensán renunciou a saír nesta categoría polo incremento de distancias nos desprazamentos, ao quedar encadrado nun grupo con equipos da zona sur de Pontevedra.

Aínda que hai moitos clubs por diante do Xuventude Sanxenxo, varios deles xa indicaron que non están polo labor de saír a competir en Primeira Futgal nas condicións propostas. O primeiro da listaxe, a Milagrosa de Lugo, amosouse moi crítico e o seu director deportivo cualificou a situación como «unha das máis vergonzosas do fútbol galego nos últimos anos«, dixo a Futbolinlugo.

Outros dous clubs lucenses, o San Ciprián (segundo na listaxe) e o Brollón (cuarto), tamén avanzaron que non aceptarán a praza. «Nós estamos ben onde estamos», sinalou Eduardo Rubal, presidente do San Ciprián.

Futbolingalicia púxose en contacto con outro equipo pontevedrés, o Rodeiro (na posición número 20), que por compartir provincia podería estar interesado. Con todo, dende a directiva deste club descartan aceptar a praza. «Estamos pouca xente, un cadro de xogadores curto para xogar nos arredores de Santiago; a Vigo non viría xogar ninguén«, apunta Xosé Moure, directivo. Consideran que un ascenso a Primeira lles obrigaría a cambiar o modelo do club.

Na provincia de Ourense, o Coles non ve viable saír a competir nese grupo. Na listaxe figuran outros equipos, como o CD La Purísima, co que esta páxina intentou sen éxito contactar este venres. No caso do Agrón Barcala, de Ames (zona de Santiago), que será o sexto equipo ao que se lle propoña o ascenso a Primeira Futgal, din que o terían que estudar. «Habería que falalo entre toda a directiva, pero o grupo de Vigo quédanos a desmán. O ascenso sempre se ve con bos ollos, pero todos os desprazamentos serían grandes, e ese é o único inconveniente que vemos«, din.

Nas vindeiras xornadas coñeceremos o equipo 108 da Primeira Futgal e veremos se se produce algunha sorpresa. O anuncio non debería demorarse, pois a competición dará comezo a fin de semana do 7 e 8 de setembro. A RFGF xa deu a coñecer os calendarios, que podes consultar aquí: grupo 1, grupo 2, grupo 3, grupo 4, grupo 5 e grupo 6.

---

Análises dos grupos da Primeira Futgal

FutbolinGalicia publicou a pasada semana a análise do grupo 2 da Primeira Futgal, que mestura equipos que antes estaban no grupo da Coruña e Ferrol con outros de Santiago e a Costa. Iso fai prever unha tempada moi novidosa para os 18 equipos. Boimorto, Dumbría e Carral semellan partir como favoritos neste grupo.

Nas últimas semanas, FutbolinGalicia púxose en contacto cos adestradores da categoría para coñecer a súa opinión na conta atrás para o inicio da liga. Nas vindeiras semanas publicaranse os artigos sobre os outro grupos desta Primeira Futgal. O obxectivo é ofrecer todos os detalles da categoría antes de que comece a rodar o balón.