Primeiras tres xornadas completadas na Primeira Futgal. Tempo insuficiente para sacar demasiadas conclusións, pero si para saber cales son os equipos máis en forma neste inicio de liga. Hai oito conxuntos que contan os seus tres partidos por vitorias e suman nove puntos. Trátase do Victoria, o Club do Mar, o Boimorto, o Celanova, o Valiño, o Unión, o Puebla e o Tyde.
Repasamos a categoría grupo a grupo
No grupo 1, o Victoria CF non fai máis que demostrar a súa condición de favorito ao ascenso. Impúxose ao Cedeira (0-2), ao Oza Juvenil (2-0) e ao Perlío (0-1) e suma os nove puntos no arranque de liga sen ter encaixado un só gol. Damián garda ben da portería. Na táboa clasificatoria, as cebras están seguidas do Marte e o Sporting Meicende, ambos os dous con sete puntos. Na outra cara da moeda está o As Pontes, un equipo chamado a estar arriba que é colista con cero puntos e cero goles anotados.
Club do Mar e Boimorto encabezan o grupo 2 con pleno de vitorias. O equipo de Caión superou ao Tordoia, o Vizoño e o Vea para demostrar o seu bo estado de forma. Do mesmo xeito, hai que salientar o inicio do conxunto adestrado por Marc Vidal, que venceu a Bertamiráns, Bastavales e Dumbría. A nivel individual hai que salientar o comezo de liga de Adrián Blanco, xogador do Calo, que leva sete goles e é o pichichi da Primeira Futgal.
O grupo 3, con equipos da provincia de Lugo, é o único no que ningún equipo suma os nove puntos. Están preto deles o Burela e o Chantada, que xa o ano pasado remataron nos postos de cabeza e teñen sete cada un. Aos mariñanos impediulle o pleno de vitorias o Guntín na segunda xornada, mentres que os da vila do río Asma empataron ante o Taboada. Seis puntos ten o filial do Racing Villalbés, cuxo dianteiro Gabriel Blanco suma cinco goles.
Plenos de vitorias no resto de grupos
Na provincia de Ourense, o Sporting Celenova lidera a clasificación do grupo 4 con nove puntos. O equipo de San Rosendo gañou ao Maceda, o Viana e o Seixalbo. Estes dous últimos figuran entre os equipos máis goleados da Primeira Futgal, tras encaixar dez tantos cada un. Tras o Celanova están Polígono (o seu xogador Ángel García leva cinco goles), Antela, Muíños e Melias, con sete.
Presenta un triplo empate na zona alta o grupo 5. Valiño, Unión e Puebla gañaron os tres partidos que disputaron. De feito, o equipo de Asados (Rianxo) non concedeu un só gol no que vai de liga. Pola súa banda, o Valiño e o Puebla mediranse na xornada cinco, que se xogará o 6 de outubro.
No grupo 6 están as dúas caras da moeda, o equipo máis goleador e o máis goleado. É líder un dos favortios, o Tyde. O conxunto de Tui venceu os tres partidos e, por se fose pouco, é o equipo da categoría que máis veces furou as redes rivais. Levan 17 goles a favor en tres partidos tras superar á Milagrosa (0-2), o Domaio (8-2) e o Arenteiro ‘B’ (0-7). Sergio Aballe fixo cinco deses tantos, mentres que Juan Paramos puxo a súa sinatura a outros tres. O Domaio é o que máis encaixa da Primeira Futgal, con 13 goles en contra.
