Tras un complicado comezo de liga, que lles colocaba no fondo da táboa xunto ao Rápido de Bouzas, o Xuvenil de Ponteareas encadeou dous vitorias consecutivas que lle permitiron escapar da zona perigosa da clasificación. O primeiro triunfo chegou en Redondela ante o Choco (1-2) e esta fin de semana conseguiron a primeira vitoria como local fronte ao Moaña (3-1), que chegaba en boa forma a Pardellas.
Nese partido destacou a actuación de Vicente Schneider Cemin, un atacante brasileiro de 21 anos que anotou dous goles decisivos. O xogador, con experiencia na Serie D do seu país, chegou na terceira xornada a Ponteareas e, desde a súa fichaxe, disputou todos os minutos posibles. En Futbolingalicia, Vicente Cemin concede a súa primeira entrevista a un medio galego para falar dos seus primeiros meses en Galicia.
Futbolingalicia: Este domingo marcaches os teus primeiros goles co Xuvenil de Ponteareas. Como te sentiches no partido?
Vicente Cemin «Estou moi contento por poder lograr os meus primeiros goles en Galicia. Cada día estou máis adaptado aos meus compañeiros de equipo».
FIG: Chegaches en verán ao club. Como foi a túa fichaxe?
VC: «Cheguei na terceira xornada ao Xuvenil de Ponteareas. O meu xogo gustoulle moito ao presidente e, a partir de aí, xa me fixeron ficha e xoguei con regularidade».
FIG: Xogaches catro partidos completos ata o momento. Que tal están a ir os primeiros meses no Xuvenil de Ponteareas?
VC: «Estou moi feliz. Cada día síntome mellor co club e co ambiente do vestiario, porque estou máis acostumado. No apartado futbolístico, penso que cada xornada que pasa estou mellorando e xogando ben».
FIG: Como te estás a adaptar a Galicia e ao club?
VC: «Estou sendo capaz de adaptarme rápido e ben. Todas as persoas que forman o Xuvenil de Ponteareas acolléronme moi ben, principalmente o presidente da entidade».
FIG: Que che parece o nivel do fútbol galego?
VC: «Creo que hai un bo nivel e moi competitivo».
FIG: Que diferenzas hai co fútbol brasileiro?
VC: «Pois creo que a principal diferenza é que no fútbol brasileiro hai xogadores que son tecnicamente mellores».
FIG: Por que decidiches cambiar de aires e chegar a Galicia?
VC: «A verdade é que xurdiu a oportunidade de xogar aquí. Eu considerei con bos ollos a proposta e pensei que podería ser un bo paso para a miña carreira futbolística. E nada, hoxe estou no Xuvenil de Ponteareas».
FIG: Qué obxectivos tes nesta tempada?
VC: «Sempre procuro dar o máximo de min en todos os partidos que disputo para axudar ao equipo. Mais tamén teño obxectivos persoais e unha meta de goles para esta tempada. Aínda que prefiro non decila».
FIG: E cales son as metas do equipo?
VC: «Creo que o primeiro obxectivo do equipo ten que ser lograr a permanencia na Preferente, pero penso con certeza que existe a posibilidade de poder ascender á seguinte categoría».
FIG: Que é o que máis botas de menos de Brasil?
VC: «Especialmente á miña familia e aos meus amigos, que están moi lonxe».
Fotografía: Manuel Macanas
