Catro partidos, catro vitorias. Así comezan a tempada os dous equipos que lideran a Segunda División Galega. No grupo 1, o SCD Pastoriza e polo segundo grupo o San Roque Casablanca.
Para entender o bo rumbo de ambos conxuntos falamos con algunhas das protagonistas destas historias. Silvia Rodríguez, capitá do Casablanca, e Uxía Vázquez, porteira e segunda capitá do Pastoriza.
O inicio soñado por calquera equipo
Non é como se comeza, pero ter un bo arranque de competición adoita dar un plus de confianza aos equipos. Ambos conxuntos mantiveron a un gran número de xogadoras con respecto ao ano pasado, conformándose así dous equipos moi consolidados.
Dende o Pastoriza recoñecen a complexidade do grupo e o esforzo que supón non errar en 4 encontros seguidos. Así e todo, non lles colleu por sorpresa este bo arranque: «podiamos facernos unha idea porque tivemos moi poucas baixas e outras incorporacións de calidade».
O San Roque Casablanca non quere deixar escapar ningún punto pero tampouco obsesionarse coa racha: «no momento que pisamos o campo a meta é clara, pelexar por acadar o partido con 3 puntos máis».
Golpe na mesa do Pastoriza no grupo 1
«Nesta liga cada partido é unha final, todos os equipos buscan acadar o ascenso directo e nós non iamos ser menos», comenta a capitá do equipo coruñés. O Pastoriza leva unhas tempadas soñando co ascenso a Primeira pero sen éxito. Na pasada campaña quedaron segundas de grupo e caeron no playoff ante a SR Calo.
Uxía coméntanos que o seu obxectivo é xogar ao que saben e intentar que iso dea os seus froitos pero «non perdemos a esperanza de que este pode ser o noso ano». Sinalan ao Cee como un dos seus rivais directos polos postos de arriba, ou ao Dumbría que tamén recoñecen como un rival duro.
O Casablanca dá a sorpresa no grupo 2
O equipo vigués está rompendo as previsións na Segunda Galicia. Acabadas de ascender e coa mirada posta no máis alto da clasificación. «Manternos invictas sendo as ascendidas é unha ledicia pero tamén deixamos todo o noso esforzo para que iso sexa así», comenta Silvia.
Quixemos coñecer as ambicións deste equipo que, tras gañar a liga en terceira o ano pasado, semella non ter teito. A súa capitá quixo ser cauta pero aseguran non ter medo: «é cedo falar de ascenso pero o obxectivo sempre vai ser poder seguir subindo chanzos».
Un dos elementos chave deste equipo é Souto, o seu referente goleador. Con 10 tantos no que vai de liga sitúase como pichichi da categoría. Xa a pasada tempada o conxunto de Vigo foi o equipo con máis dianas de tódalas categorías galegas con 154 goles anotados.
