A Terceira Futgal segue deixando cifras espectaculares en todos os seus grupos, con auténticos especialistas da área que están a marcar diferenzas cada fin de semana. Entre todos eles destacan dous nomes propios: o dun porteiro reconvertido en dianteiro que está a sorprender na Costa e, sobre todo, o do máximo goleador da categoría, que xa suma 51 tantos no Grupo Vigo 2.

Pero máis alá deses casos singulares, a loita polo pichichi está moi viva en practicamente todos os grupos, con rexistros que superan amplamente a vintena de goles e que reflicten o enorme potencial ofensivo da categoría, que esta fin de semana descansa polo Entroido.

Pontevedra

No Grupo Pontevedra 1, David Álvarez (CD Cesantes) lidera con autoridade con 29 goles, mentres que no Grupo Pontevedra 2 o máximo realizador é Miguel Rodríguez (Noalla SD), con 22 tantos.

A Coruña

En A Coruña 1, Iago Martínez (Sin Querer SD) suma 19 goles. No Grupo A Coruña 2, Germán Fernández (AD Cristo Rey) encabeza a táboa con 17, os mesmos que Martín Sampedro (CD Xuventude Aranga) no Grupo A Coruña 3.

A Costa: o caso máis curioso

O foco está en Pablo Pose (SD Coristanco), máximo goleador do grupo con 21 goles. O seu caso é especialmente chamativo: foi porteiro toda a vida, chegando a formarse na base do Deportivo, e esta é a súa primeira tempada como dianteiro. A súa adaptación non puido ser máis produtiva.

Ferrol

No Grupo Ferrol, Yago González (CF Monfero) lidera con 14 goles.

Santiago

Na fase previa compostelá tamén hai cifras destacadas:

• Grupo 1: Mateo Ordóñez (SD Xuventude Aguiño B), 13 goles.
• Grupo 2: Raúl Calvo (CD Rois), 12 goles.
• Grupo 3: David Ferreira (Resmón CF), 29 goles.
• Grupo 4: Víctor Vilariño (SD Bandeira), 23 goles.

Lugo

En Lugo 1, Javier Álvarez (Mondoñedo Ciudad) suma 14 tantos, os mesmos que Alexandre López (Taboada CF B) en Lugo 2.

Ourense

No Grupo Ourense 1, Ramón Iglesias (Amoeiro CF) alcanza os 21 goles, mentres que no Grupo Ourense 2 o líder é Adrián Fernández (Atlético Pontedeva), con 13.

Vigo: cifras descomunais

Se hai un grupo onde os números se disparan é en Vigo. No Grupo Vigo 1, Telmo Aldao (Atlético Huracán de Zamáns) suma 31 goles. Pero o gran nome propio da categoría é Aitor Costas (CF Guillarei), líder do Grupo Vigo 2, que acumula nada menos que 51 goles. Un rexistro extraordinario que encaixa coa súa traxectoria goleadora: nas súas primeiras tempadas como sénior xa anotara 32 e 35 goles, e no seu último ano como xuvenil chegou a asinar a impresionante cifra de 105 tantos.