A UD Ourense pechou este domingo en terras castelás a semana máis estraña da súa primeira tempada na Segunda RFEF. Sete días marcados por un conflito extradeportivo e dúas derrotas ante rivais de máxima entidade, o Numancia e a Gimnástica Segoviana.
O pasado domingo, o conxunto ourensán perdeu no Couto fronte ao Numancia, un dos aspirantes ao ascenso. Pero a análise deportiva quedou nun segundo plano polo sucedido fóra do terreo de xogo a noite anterior.
Esa mesma mañá transcendeu que o dianteiro Víctor Gamarra fora suspendido de emprego e soldo por comportamentos inapropiados, de natureza incívica, ocorridos o sábado. A decisión, adoptada polo club e apoiada polo técnico Borja Fernández abriu un proceso interno no que se foron coñecendo máis detalles ao longo da semana.
𝐁𝐀𝐈𝐗𝐀 | Víctor Gamarra
— UD Ourense 🐺 (@UDOurense2014) December 12, 2025
O Ourense e Gamarra separan os seus camiños cinco meses despois. O clube agradece o compromiso e rendemento do futbolista dende a súa chegada, e deséxalle moita sorte para os seus seguintes pasos persoais e profesionais.
A parcela directiva e… pic.twitter.com/bM2JYspYCs
Finalmente, a UD Ourense anunciou a través dun comunicado a rescisión do contrato do futbolista madrileño apenas cinco meses despois da súa chegada. O club agradeceulle o «compromiso e rendemento» ao xogador -máximo goleador esta temporada con tres tantos-, pero subliñou que a dirección actuou «de forma tallante» ao considerar que os feitos eran «diametralmente opostos á filosofía da institución e do deporte».
Ademais, a entidade puxo o acento na necesidade de coidar a saúde mental e os hábitos persoais, lembrando que «pedir axuda é ou paso máis valente».
Derrota diante da Gimnástica Segoviana
O peche a esta semana chegou este domingo cunha nova derrota, esta vez diante da Gimnástica Segoviana, líder do grupo (2-0). Dous tropezos consecutivos que, malia non ser preocupantes -o equipo é noveno, mantense na metade da táboa e con marxe sobre os postos de descenso– son os primeiros dende o mes de setembro e coinciden co caso Gamarra. Un capítulo desagradable que o club confía en deixar atrás canto antes para recuperar a normalidade.
Imaxe de portada: Gimnástica Segoviana.
