A selección galega Uefa, campioa de España en 2020 e 2024 e campioa de Europa no 2023, disputou esta fin de semana en Palencia a primeira fase nacional da Copa das Rexións. Manolo García convocou a 18 futbolistas da Terceira RFEF: Andrés (Gran Peña), Ayoub (Viveiro), Lucas Camba (Alondras), Lombao (Arosa), Achore (Montañeros), Enjamio, Yosi, Facu Moreyra (Boiro), Rachu (Noia), Adri Rodríguez (Céltiga), Brais Vidal, Óscar López, Carabán (Estradense), Mati (Gran Peña), Noel (Juventud Cambados), Make (Rácing Villalbés), Dopico, Juan Cambón (Somozas).
Derrota contra Andalucía
Os celestes comezaron cunha derrota pola mínima fronte a Andalucía (1-2), o mesmo adversario ao que se enfrontara na final nacional de 2020.
O inicio do encontro e o arranque da segunda parte pasaron factura aos de Manolo García. Andalucía abriu a lata cun impecable lanzamento de falta directa de Ángel. Nos primeiros compases da reanudación, Ezequiel fixo o 0-2 nunha xogada aparentemente sen perigo.
A pesar do golpe, Galicia lanzouse á procura do empate. Lucas Camba, cando quedaban dez minutos para o final, recurtou distancias e reavivou a esperanza. A selección volcouse ao ataque, pero apenas conseguiu xerar ocasións claras para igualar o marcador.
Empate contra Castela e León
A selección galega continúa á espera de que a RFEF faga pública a táboa definitiva do Grupo D nesta primeira fase nacional da Copa das Rexións UEFA. A RFGF presentou un recurso denunciando unha posible aliñación indebida de Andalucía no encontro do sábado. Se o recurso prospera, Galicia obtería o pase á seguinte rolda pese a rematar cun só punto.
Os de Manolo García estaban obrigados a gañar este domingo á anfitrioa, Castela e León, e, ademais, por unha ampla marxe de goles para clasificarse como unha das mellores segundas. Con todo, e aínda que conseguiu adiantarse no marcador en dúas ocasións, o combinado galego non pasou do empate (2-2).
Pendentes dun recurso para lograr a clasificación
Se a resolución da RFEF é favorable, os galegos accederían xunto a outros sete equipos ás eliminatorias que se xogarán entre o 28 e o 29 de xaneiro. Os catro combinados que pasen xogarán polo título nacional do 27 de febreiro ao 1 de marzo.
