A SD Chantada é líder sólido do grupo 3 de Primeira Galicia tras un arranque case inmaculado: once vitorias e só unha derrota. No Sangoñedo respírase ambición, e Pablo Iglesias, máximo goleador do grupo con nove tantos, representa á perfección ese espírito competitivo.

O dianteiro, criado no club e debutante con só 16 anos, analiza o excelente momento do equipo, a pelexa co Residencia e a necesidade, cada vez máis evidente, de devolver ao conxunto chantadino á Preferente.

Futbolingalicia: A SD Chantada encabeza o grupo 3 de Primeira Galicia con once vitorias e unha soa derrota. Como está a ser este inicio de liga do cadro chantadino?

Pablo Iglesias: «Está a ser un inicio de tempada ilusionante, sobre todo. Sabemos que os comezos de liga son moi importantes ata o parón de Nadal e estamos a tentar sacar adiante todos os partidos».

FIG: No último partido goleastes ao Foz por 5-0 no Sangoñedo. Que valoración fas dese encontro?

PI: «Foi un partido que soubemos dominar dende o principio e que concretamos na segunda parte. O Foz sempre é un rival complexo».

FIG: Porén, a única derrota chegou contra o Santaballés, un equipo actualmente en descenso. Que pasou nese encontro?

PI: «O que pasou pode ocorrer en calquera campo e partido da categoría. Non debemos baixar a garda en ningún momento. Moitas veces a táboa clasificatoria é enganosa».

FIG: O único equipo que segue a estela da SD Chantada é o Residencia, que aínda non coñece a derrota pero ten un punto menos. Como ves esa loita polo ascenso directo?

PI: «Considero que aínda é moi cedo para falar de ascenso directo para calquera equipo. Debemos seguir cos pés na terra e traballar semana a semana como o estamos a facer».

FIG: O obxectivo do club é ascender a Preferente?

PI: «Si. Debemos ser realistas e conscientes de que levamos anos pelexando por iso. É hora de asumir esa responsabilidade e facer todo o posible para tirar a porta abaixo e intentar acadar ese ascenso que o club e as persoas que o rodean merecen».

FIG: Van varios anos quedándose moi preto de acadar ese salto de categoría. Precisa o club ese ascenso a Preferente?

PI: «Penso que o precisa o club e todos aqueles que nos levan apoiando estes anos. Considero que xa temos unha plantilla experimentada en competir polo obxectivo do ascenso e faremos todo o posible para conseguilo».

FIG: Este ano tamén xogastes a Supercopa Galicia, onde había en xogo un pase á rolda previa da Copa do Rei. Como foi esa experiencia?

PI: «Foi unha experiencia moi gratificante, poder ver que somos capaces de plantar cara a equipos como o Cultural Areas, que é un dos candidatos a ascender a 3ª RFEF».

FIG: No apartado persoal, es o máximo goleador do grupo con nove goles. Como te estás a sentir neste inicio de liga?

PI: «Estou moi a gusto. Os goles non deixan de ser un número; o importante é que axuden a sacar os partidos adiante».

FIG: Levas case toda a vida no club. Que significa para ti a SD Chantada?

PI: «Si, levo dende cadetes no club. A SD, máis ca un club, é un grupo de amigos que desfruta competindo e xogando cada semana. Temos unha plantilla de luxo estes últimos anos». 

FIG: Como recordas os teus primeiros partidos co sénior con só 16 anos?

PI: «Recordo o meu debut en Cerdeiriños con Zecho no banco. Foi un día moi especial que nunca esquecerei».