O Progresista FC está a completar un gran inicio de curso na Primeira Futgal, consolidándose como un dos equipos máis fiables da categoría e asinando recentemente unha das goleadas da xornada cun contundente 1-7 ante o Candeán. Un dos protagonistas deste bo momento é Bruninho, que xa suma catro goles en cinco partidos desde a súa chegada ao conxunto vigués.
O atacante brasileiro analiza nesta entrevista a evolución do equipo, o seu rendemento persoal, a loita pola permanencia e o salto emocional que supuxo despedirse do Cultural Areas tras máis de oito anos defendendo esas cores. Sincero e directo, Bruninho recoñece que aínda sente “gasolina para queimar” neste novo desafío deportivo.
Futbolingalicia: O Progresista protagonizou a gran goleada da xornada na Primeira Futgal cun 1-7 ante o Candeán. Que valoración fas do partido?
Bruninho Vasconcelos: «Neste último mes estamos collendo mellor algúns automatismos importantes na nosa forma de xogar. Iso, independentemente de quen sexa o rival, dános certa vantaxe. O partido definiuse así: con ocasións moi automatizadas e tamén cun chisquiño de fortuna».
FIG: Anotaches dous goles no partido e xa son catro en cinco encontros tras a túa chegada ao equipo. Como te estás a sentir neste novo club?
BV: «A acollida foi das mellores. Aínda que xa coñecía unha boa parte do plantel, compartir vestiario é algo distinto, e tanto xogadores como directiva e presidente fixéronme sentirme parte do club desde o primeiro día. Creo que os goles son o resultado diso: de encaixar ben no equipo, de ter a confianza dos compañeiros… así todo é moito máis doado».
FIG: Estades preto dos postos de fase de ascenso. Cal é o obxectivo do Progresista?
BV: «Eu creo que o obxectivo principal é a permanencia e facer os puntos canto antes. O club vén de dous ascensos nos últimos tres anos e manterse é algo importante. Unha vez conseguido ese obxectivo, xa veremos onde estamos e ata onde podemos chegar».
FIG: Fai pouco máis dun mes despedícheste do club da túa vida en Galicia, o Cultural Areas, cunha homenaxe. Como se deu esa saída?
BV: «A verdade é que o proxecto do Areas para esta tempada é exactamente o que se ve: loitar polo ascenso directo a Terceira. Con novas fichaxes perdín algo de protagonismo e de minutos, pero eu sentía que aínda podía dar máis. Por iso decidín buscar un novo desafío que me sacase da zona de confort».
FIG: Que significa o Cultural Areas para ti?
BV: «É o club da miña vida en Galicia. Sempre me trataron ben: socios, directiva, presidenta, compañeiros e corpos técnicos. Sentinme moi coidado desde o primeiro día».
FIG: Despois de máis de oito anos no club, queda algunha espiña cravada?
BV: «Gustaríame moito ter ascendido a Terceira División. Cheguei ao club xusto na tempada na que descendemos por arrastres, e encantaríame ter logrado volver subir. Por outra banda, gañamos a Copa Deputación por primeira vez e iso déixame unha sensación de deber cumprido».
FIG: Cal foi o teu mellor momento no Cultural Areas?
BV: «Teño moitos recordos bos e celebracións de goles, pero o momento máis especial foi saír ao balcón do Concello coa Copa Deputación nas mans diante de toda a xente que acudiu a recibir o equipo».
FIG: A Galicia chegas da man do Barbadás. Como recordas ese ano?
BV: «O ano de adaptación adoita ser complicado, pero por sorte en Barbadás a xente tivo moito cariño comigo e fíxome moi fáciles as cousas».
FIG: Como se produce a túa chegada ao conxunto ourensán?
BV: «Foi un ano no que o Barbadás apostou por varios xogadores estranxeiros. O club, a través dun brasileiro que xa vivía en Galicia, contactou comigo para valorar a posibilidade de vir a España, e acabei aceptando o desafío».
FIG: Que lle queda a Bruninho por facer no mundo do fútbol?
BV: «Como dixen antes, a miña cabeza dicíame que aínda non era hora de parar, e o desafío no Progresista é demostrarme a min mesmo que aínda teño gasolina para queimar. Agora queda ver como respondo ao final de cada tempada e, cando toque, pasarei a estar fóra das liñas pero sempre ligado a este deporte que me encanta».
