O fútbol feminino galego vén de experimentar un xiro inesperado que marcará a configuración da próxima tempada na Terceira Federación. O CD Lugo, que tiña asegurada a permanencia na categoría nacional, renunciou de forma sorpresiva á súa praza sen informar con tempo ás súas xogadoras, segundo comunicaron as xogadoras en redes sociais. Esta decisión abriu unha vacante que, tras o proceso regulamentario correspondente, foi ocupada polo Domaio FC, que confirma así o seu salto ao fútbol nacional.

A semana pasada falabamos da inestabilidade no fútbol feminino para consolidar proxectos e isto non fai máis que confirmar esa hipótese. Hoxe analizamos os feitos deste novo desaxuste.

O Lugo sentenza a morte a súa sección feminina

A decisión do CD Lugo de suprimir a súa sección feminina chegou sen aviso e causou unha fonda decepción tanto no plantel como no contorno do club. Segundo publica La Voz de Galicia, as xogadoras non foron avisadas con antelación e tiveron que enterarse por terceiros ou a través da prensa da desaparición do proxecto. Este desenlace rompe coa aposta pola estabilidade que o club lucense parecía estar consolidando nas últimas campañas.

A renuncia, oficializada o 11 de xullo ante a RFEF, obrigou a activar o proceso de reasignación da praza vacante. O regulamento da Federación Española establece que, en casos coma este, o dereito de acceso pasa primeiro aos equipos descendidos (que nesta ocasión non existían), e logo aos mellores clasificados da categoría inferior pertencentes á mesma federación autonómica.

O Domaio celebra un ascenso histórico

A orde de méritos deportivos situaba ao Domaio FC como o seguinte equipo lexitimado para cubrir a praza, logo de que o Lóstrego CF “B”, sexto clasificado da 1ª División Galega, non puidera acceder por dependencia directa co seu equipo principal, xa en Terceira.

Con esta resolución, o Domaio convértese en novo equipo da Terceira Federación de fútbol feminino, segundo xa confirmou o propio club en declaracións a Faro de Vigo. O Domaio, que estaba traballando para montar o equipo en Primeira Galega, agora planificará unha tempada de maior esixencia.

Un reto ilusionante

A chegada do Domaio á Terceira RFEF supón un fito para a entidade, que xa confirmou oficialmente a súa inscrición na categoría nacional. A entidade afrontará un novo reto deportivo e institucional, cun nivel competitivo máis alto e con equipos xa consolidados na categoría como o Sárdoma, Victoria CF, Victoria FC, PM Friol, Lóstrego ou Bergantiños.

Pola contra, o abandono do Lugo supón un paso atrás significativo no desenvolvemento do fútbol feminino lucense, que agora queda, de novo, só co Friol en Terceira RFEF e como proxecto referente da provincia.